Աննա Հակոբյան
ՀՀ վարչապետի տիկին, Հոգաբարձուների խորհրդի նախագահ

Աննա Հակոբյանը ՀՀ վարչապետի տիկինն է, լրագրող, հասարակական գործիչ։ 2003-ից մինչև 2008 թ. որպես լրագրող աշխատել է «Հայկական ժամանակ» օրաթերթում։ 2008-ին ամուսնու՝ «Հայկական ժամանակ» օրաթերթի գլխավոր խմբագիր Նիկոլ Փաշինյանի ընդհատակ անցնելուց, այնուհետև՝ ազատազրկումից հետո ստանձնել է օրաթերթի գլխավոր խմբագրի ժամանակավոր պաշտոնակատարի պարտականությունները։ 2013 թվականից դարձել է օրաթերթի գլխավոր խմբագիրը: 2018 թվականի մայիսի 8-ին ՀՀ վարչապետի պաշտոնում Նիկոլ Փաշինյանի ընտրությունից հետո Աննա Հակոբյանը, արդեն որպես երկրի ղեկավարի տիկին, ընդարձակում է իր գործունեության շրջանակը: Մայիսին նա ստանձնում է «Սիթի օֆ սմայլ» («Ժպիտների քաղաք») հիմնադրամի հոգաբարձուների խորհրդի նախագահությունը, հունիսին հիմնադրում է «Իմ քայլը» հիմնադրամը, օգոստոսին մեկնարկում «Կանայք հանուն խաղաղության» արշավը։ Այժմ Հակոբյանը հիմնադրամների ղեկավարումը և խաղաղության արշավի շրջանակներում գործունեությունը համատեղում է «Հայկական ժամանակ» օրաթերթի գլխավոր խմբագրի պարտականությունների հետ։

Աննա Հակոբյանը Երևանի պետական համալսարանի լրագրության ֆակուլտետի շրջանավարտ է, մասնակցել է մի շարք դասընթացների Հայաստանում և արտերկրում։

Սերժ Թանկյան
Երգիչ, երգահան, հասարակական գործիչ

Սերժ Թանկյանը Լիբանանում ծնված, այնուհետև Լոս Անջելես տեղափոխված հայազգի երգիչ է, պոետ, երգահան, նկարիչ, ակտիվիստ և կոմպոզիտոր, System of a Down հանրահայտ խմբի առաջատար երգիչ և երգահան։ Խումբը թողարկել է հինգ ալբոմ, 2006-ին B.Y.O.B. երգի համար ստացել «Գրեմմի» մրցանակ։ 2007-ից ի վեր Թանկյանը թողարկել է նաև հինգ սոլո ալբոմ, հեղինակել մի շարք ֆիլմերի և տեսախաղերի երաժշտություն։ 2001-ից գործում է նրա կողմից ստեղծված Serjical Strike ձայնագրման ընկերությունը (լեյբլ)։ 2002-ին երաժիշտ Թոմ Մորելլոյի հետ ստեղծել է «Արդարության առանցք» (Axis Of Justice) հասարակական կազմակերպությունը, որի նպատակն է համատեղել արվեստի մարդկանց ջանքերը հանուն սոցիալական արդարության։ Վերջին տարիներին Թանկյանը զբաղվում է նաև նկարչությամբ. ստեղծել է շուրջ 40 կտավ, մի շարք ցուցահանդեսներ ունեցել ԱՄՆ-ում և Նոր Զելանդիայում։

Արսինե Խանջյան
Դերասանուհի, պրոդյուսեր, հասարակական գործիչ

Արսինե Խանջյանը դերասանուհի է, պրոդյուսեր, հասարակական գործիչ։ Նա քաղաքագիտության և հանրային կառավարման մագիստրոսի կոչում ունի Տորոնտոյի համալսարանից։ Դերասանական կարիերայից զատ, նա քաղաքականության մշակման մեծ փորձ ունի արվեստների և կառավարման ոլորտներում։ Կինոյում և թատրոնում իր դերերի համար Արսինե Խանջյանը միջազգային ճանաչում է ձեռք բերել, արժանացել մի շարք մրցանակների։ Արվեստի, պատմության և մշակութային հարցերում իր ակտիվ ներգրավվածության համար պարգևատրվել է մի շարք մեդալներով Կանադայում և դրա սահմաններից դուրս (Թագուհու ոսկե հոբելյանի մեդալակիր (2002), Սուրբ Մեսրոպ Մաշտոց մրցանակ (2003), Կինո և հեռուստատեսության բնագավառում կանանց ստեղծարար գերազանցության բյուրեղյա մրցանակ (2005), «Հայրենիքին մատուցած ծառայությունների համար» 1-ին աստիճանի մեդալ (2011) և այլն)։ Խանջյանը շարունակում է ակտիվ հանրային գործունեություն ծավալել։ Նա, մասնավորապես, հայագիտական ուսումնասիրությունների և փաստագրման Զորյան ինստիտուտի տնօրենների խորհրդի անդամ է։

Photo credit: Guilio Muratori

Լենա Նազարյան
ՀՀ Ազգային ժողովի նախագահի տեղակալ

Լենա Նազարյանը ՀՀ Ազգային ժողովի նախագահի տեղակալն է։

2005-2009 թթ. աշխատել է որպես «Հետք» շաբաթաթերթի լրագրող: 2009-2015 թթ.՝ «Թրանսփարենսի Ինթերնեշնլ հակակոռուպցիոն կենտրոն» ՀԿ-ի ընտրական ծրագրերի համակարգող: 2015-2016 թթ. եղել է Հայաստանի ամերիկյան համալսարանի Պատասխանատու հանքարդյունաբերության կենտրոնի շրջակա միջավայրի մոնիտորինգի ծրագրի համակարգող։

2013 թվականից սկսած ակտիվ քաղաքականության ոլորտում է։ 2016 թ. ընտրվել է «Քաղաքացիական պայմանագիր» կուսակցության վարչության անդամ, 2017-ին՝ ԱԺ պատգամավոր («Ելք» կուսակցությունների դաշինք): 2019 թ. հունվարի 15-ին ընտրվել է Հայաստանի Հանրապետության Ազգային ժողովի նախագահի տեղակալ:

Լենա Նազարյանն ավարտել է ԵՊՀ ժուռնալիստիկայի ֆակուլտետը, միաժամանակ՝ Ժուռնալիստիկայի հայկական դպրոցի մեկամյա դասընթացը: 2014 թ.՝ Ժամանակակից արվեստի ինստիտուտը: Արժանացել է «Խոսքի ազատություն» մրցանակին (2013 թ., «Ասպարեզ» ժուռնալիստների ակումբ): Լենա Նազարյանը «Իմ քայլը» հիմնադրամի համահիմնադիրն է։

Վահագն Թեւոսյան
ՀՀ Ազգային ժողովի պատգամավոր

Վահագն Թևոսյանը ՀՀ Ազգային ժողովի պատգամավոր է՝ «Իմ քայլը» խմբակցության անդամ։ Ավարտել է Երևանի պետական համալսարանի բանասիրության ֆակուլտետի հայոց լեզվի և գրականության բաժինը:

1998 -2004 թթ. աշխատել է որպես «Օրագիր», այնուհետև «Հայկական ժամանակ» օրաթերթերի լրագրող, ապա խմբագիր: 2004-2007 թթ. եղել է «Հասարակական երկխոսության և զարգացումների կենտրոն» ՀԿ-ի հասարակայնության հետ կապերի մասնագետ, 2008-2010 թթ.՝ «Ռադիո Հայ» ռադիոկայանի լրատվական ծառայության տնօրեն, 2010-2011 թթ.՝ «Հրապարակ» օրաթերթի կայքի խմբագիր: 2011-2017 թթ. ընթացքում որպես հաղորդումների խմբագիր աշխատել է «Արմնյուզ», այնուհետև՝ «Արարատ» հեռուստաընկերությունում: Նախքան ԱԺ պատգամավոր ընտրվելը եղել է «Վայրի բնության և մշակութային արժեքների պահպանման» հիմնադրամի հանրային կապերի համակարգող, ապա 2018 թ. հուլիս-դեկտեմբեր ամիսներին՝ Հայաստանի հանրային հեռուստաընկերության լրատվական և վերլուծական հաղորդումների տնօրեն: 2018-ի հունիսին Աննա Հակոբյանի և Լենա Նազարյանի հետ համահիմնադրել է «Իմ քայլը» հիմնադրամը։

Վահան Վարդապետյան
Բժիշկ, բժշկական գիտությունների թեկնածու

Վահան Վարդապետյանը բժիշկ մանկաբարձ-գինեկոլոգ է, բժշկական գիտությունների թեկնածու։ Երևանի բժշկական ինստիտուտն ավարտել է գերազանցության կարմիր դիպլոմով, այնուհետև ավարտել նույն ինստիտուտի օրդինատուրան և ասպիրանտուրան։ Երկու անգամ վերապատրաստում է անցել Ֆրանսիայի Մարսել քաղաքի համալսարանական կլինիկայում: 1994թ.-ից ղեկավարում է Պերինատոլոգիայի, մանկաբարձության և գինեկոլոգիայի հանրապետական ինստիտուտի վերարտադրողական առողջության բաժանմունքը, որտեղ արդյունավետորեն բուժվել են անպտղությամբ տառապող հազարավոր ամուսնական զույգեր: Զբաղվում է ակտիվ հասարակական-քաղաքական, ինչպես նաև մշակութային գործունեությամբ և հրապարակախոսությամբ:

Սառա Անջարգոլյան
ՀՀ Սփյուռքի գործերի գլխավոր հանձնակատարի գրասենյակի ղեկավար

Սառա Անջարգոլյանը Իմփաքթ Հաբ Երևանի համահիմնադիրն ու ղեկավարն է։ Նա նաև իրավաբան է և մուլտիմեդիա լրագրող (http://www.saraanjargolian.com/)։ Ծնվել է Լոնդոնում, մեծացել ու կրթություն ստացել ԱՄՆ-ում (Կալիֆորնիայի համալսարան (Լոս Անջելես)՝ քաղաքագիտություն և հանրային քաղաքականություն, Կալիֆորնիայի համալսարան (Բերկլի)՝ իրավագիտություն)։ Այժմ ապրում և աշխատում է Հայաստանում։ Իմփաքթ Հաբի շրջանակներում Սառայի գործունեությունն ուղղված է փոփոխություն բերողների և նորարարների զորացմանը՝ սոցիալական ազդեցություն ունեցող նրանց նախագծերի հասունացման ու իրագործման միջոցով։

Լուսինե Քասարջյան
FestivAr փառատոնների ասոցիացիայի գործադիր տնօրեն

Լուսինե Քասարջյանը «FestivAr» հայկական փառատոնների ասոցիացիայի գործադիր տնօրենն է։ Կազմակերպության նպատակն է համակարգել, խթանել և աջակցել հայկական փառատոնների կայուն զարգացումը Հայաստանի քաղաքային և գյուղական շրջաններում։ 2014 թ․-ից սկսած աշխատել է որպես Հայաստանում «Armenia Tree Project» հիմնադրամի տնօրեն։ 2009 թ․ Լուսինեն համահիմնադրել է «ReAnimania» միջազգային անիմացիայի փառատոնը Երևանում, որտեղ աշխատում է որպես արվեստի գծով տնօրեն շուրջ 4 տարի։ Մի շարք հիմնադրամների, այդ թվում՝ «Awesome Foundation»-ի, «Armenian Education Foundation»-ի հոգաբարձուների խորհրդի անդամ է։

Ավարտել է Երևանի պետական Բրյուսովի անվան լեզվաբանական համալսարանը, ապա ուսումը շարունակել Սան Ֆրանցիսկոյի Արվեստի ակադեմիայում։

close