“Quanta” քվանտային և մեզոսկոպիկ ֆիզիկայի մագիստրոսական կրթական ծրագիր

Հաշվի առնելով արդի միջազգային գիտատեխնիկական զարգացումները, քվանտային տեխնոլոգիաների, հատկապես քվանտային մեխանիկայի, որպես գիտության, շատ կարևոր կիրառական նշանակությունը՝ «Իմ Քայլը» հիմնադրամը 2022 թվականին նախաձեռնեց և մեկնարկեց “Quanta” քվանտային և մեզոսկոպիկ ֆիզիկայի մագիստրոսական կրթական ծրագիրը: Ծրագիրը մշակվել է  Հայ֊ռուսական (սլավոնական) համալսարանի ֆիզիկաինժեներական ինստիտուտի, ԳԱԱ Ֆիզիկակական հետազոտությւնների ինստիտուտի և Հայ-ռուսական համալսարանի ընդհանուր ֆիզիկայի և քվանտային նանոկառուցվածքների ամբիոնի պրոֆեսորների հետ համատեղ, իսկ ծրագրի գիտական ղեկավարն է ֆիզիկամաթեմատիկական գիտությունների դոկտոր, պրոֆեսոր, ՀՀ գիտության վաստակավոր գործիչ Հայկ Սարգսյանը:

Ծրագրի պրոֆեսորադասախոսական կազմում ընդգրկված են ինչպես հայաստանաբնակ, այնպես էլ աշխարհի առաջատար համալսարաններից հրավիրված մասնագետներ: Մասնավորապես, ծրագրի առաջին և երկրորդ փուլերով դասավանդելու նպատակով Հայաստան են հրավիրվել  պրոֆեսորներ Սոտիրիս Բասկոտասը և Խրիստոս Գարուֆալիսը (Պատրայի համալսարան), Վահագն Աբգարյանը (Դուբնայի միջուկային հետազոտությունների ինստիտուտ), Տիգրան Վարտանյանը (Սանկտ Պետերբուրգի տեղեկատվական տեխնոլոգիաների, մեխանիկայի և օպտիկայի ազգային հետազոտական համալսարան), Դավիդ Բլաշկեն (Վրոցլավի համալսարան), Դմիտրի Բուդկերը (Բերկլիի համալսարան, Մայնցի համալսարան), Տիգրան Գալստյանը (Լավալի համալսարան), Լյուդվիգ Պետրոսյանը (Ջեքսոնի պետական համալսարան), Կլոդ Լերուան (Բուրգունդիայի համալսարան), Դմիտրի Ֆիրսովը (Սանկտ Պետերբուրգի պոլիտեխնիկական համալսարան) և Մարցիս Աուզինշը (Լատվիայի համալսարան): Հայաստանաբնակ մասնագետներից ծրագրի շրջանակում դասավանդում են ՀՀ ԳԱԱ ֆիզիկական հետազոտությունների ինստիտուտի տնօրեն, պրոֆեսոր Արամ Պապոյանը, ՀՀ ԳԱԱ Ֆիզիկայի կիրառական պրոբլեմների ինստիտուտի պրոֆեսոր Հայկ Սարգսյանը, ԵՊՀ ֆիզիկայի ինստիտուտի տնօրեն, պրոֆեսոր Խաչատուր Ներկարարյանը, ԵՊՀ ֆիզիկայի ինստիտուտի պրոֆեսոր Արամ Սահարյանը և այլք: Ուսանողների մագիստրոսական թեզերը ղեկավարում են ինչպես հայաստանաբնակ, այնպես էլ արտերկրից հրավիրված մասնագետները:

2024թ․ փետրվարին ծրագրի առաջին փուլի  10 ուսանողներ հաջողությամբ պաշտպանել են մագիստրոսական թեզերը և ստացել պետական նմուշի դիպլոմներ: Այժմ ուսանողները գիտական ղեկավարների հետ աշխատում են մագիստրոսական թեզերը գիտական հոդվածների տեսքով գիտական հանդեսներում տպագրելու ուղղությամբ․ երկու ուսանողի աշխատանքներ արդեն իսկ տպագրվել են՝ Գոռ Միրզոյանի հոդվածը տպագրվել է ACS Appl. Nano Mater ամսագրում (գիտական ղեկավար՝ Տիգրան Վարտանյան), իսկ Արամ Նահապետյանինը՝ ՀՀ ԳԱԱ ամսագրում (գիտական ղեկավար՝ Հայկ Սարգսյան):  10 շրջանավարտներից 9-ն աշխատում են ՀՀ-ում գործող տարբեր գիտահետազոտական կենտրոններում:

Ծրագրի երկրորդ փուլով ուսումնառությունը շարունակում են ևս 11 ուսանողներ:

2025-2026թթ․ ուսումնական տարվանից “Quanta” քվանտային և մեզոսկոպիկ ֆիզիկայի մագիստրոսական ծրագիրը կիրականացվի Երևանի պետական համալսարանի հետ համատեղ: