«Հորիզոնները» Սյունիքի մարզում

Հաշվի առնելով Արմավիրի և Արագածոտնի մարզերում ունեցած հաջողությունները, ծրագրի նկատմամբ աշակերտների շրջանում մեծ հետաքրքրվածությունը՝ «Իմ քայլը» հիմնադրամը Հայաստանի ազգային ագրարային համալսարանի հետ համատեղ մեկնարկում է «Հորիզոններ» դուալ կրթական ծրագրի երկրորդ փուլը: Ծրագրի շահառու են ընտրվել Սյունիքի մարզի Սիսիան և Գորիս խոշորացված համայնքների 9-ը ավագ դպրոցներ (Անգեղակոթ, Բռնակոթ, Շաղաթ, Շամբ, Լոր, Շաքի, Սիսիանի ավագ դպրոց, Գորիսի հմր. 1 և հմր. 4 ավագ դպրոցներ):

Սյունիքի մարզում կներդրվի «Ագրոտեխնոլոգիա» դասընթացը երկու բաղադրիչներով՝

• բուսաբուծության և անասնաբուծության վարում
• գյուղատնտեսական առաջնային արտադրանքի վերամշակում, նորագույն տեխնոլոգիաների գործարկում:

Ծրագրի ավարտին սովորողները կունենան հիմնարար գիտելիքներ դաշտային և բանջարային մշակաբույսերի, բազմամյա պտղահատապտղային բույսերի  տեսակային կազմի, շրջանացված սորտերի, դրանց խմբավորման, մշակության տեխնոլոգիաների, ցանքատարածքների ու այգետարածքների տեղաբաշխման,  գյուղատնտեսական տարբեր կենդանիների բուծման ու պահվածքի կազմակերպման, ինչպես նաև գյուղատնտեսության ոլորտում նորագույն և ժամանակակից տեխնոլոգիաների ներդրման և դրանց արդյունավետության վերաբերյալ:

Ծրագրի շրջանակում կիրականացվի կենսաբանության, աշխարհագրության, ֆիզիկայի, քիմիայի, տեխնոլոգիայի և հասարակագիտության առարկաների ուսուցիչների վերապատրաստում: Նրանց կտրամադրվեն անհրաժեշտ ուսումնական նյութեր և մեթոդական աջակցություն, իսկ սովորողների համար կկազմակերպվեն գործնական պարապմունքներ տարբեր տնտեսություններում, գործարաններում և ագրոբիզների ձեռնարկություններում: