Ծրագիրը Կոտայքի, Արարատի և Վայոց Ձորի մարզերում

Պատերազմի մասնակիցների մասնագիտական ներուժի բացահայտման ծրագրի 3-րդ փուլն իրականացվում է Կոտայքի, Արարատի և Վայոց Ձորի մարզերում՝ թիրախավորելով 44-օրյա պատերազմի հետևանքով հաշմանդամություն ձեռք բերած զինծառայաողներին: Իրազեկման աշխատանքներից հետո սեպտեմբեր ամսին Ջերմուկ քաղաքում երկու փուլով կազմակերպվեց մասնագիտական կողմնորոշման ճամբար, որն անհրաժեշտ է ծրագրի մասնակիցների սեփական կարողություններն ու գաղափարները վերհանելու, մշակելու և դրանց հիման վրա անհատական զարգացման պլանները կազմելու համար:

Ծրագրին Կոտայքի, Արարատի և Վայոց Ձորի մարզից մասնակցում է պատերազմի հետևանքով հաշմանդամության կարգ ձեռք բերած 83 զինծառայող: Նրանցից 73-ն ընտրել են բիզնեսի պլանավորման և կառավարման դասընթացներ, մյուսները հաճախում են մասնագիտական վերապատրաստման դասընթացների՝ SMM և մարքեթինգ, 3D մոդելավորում, հաշվապահություն, խոհարարություն և այլն: Մասնագիտական վերապատրաստման և բիզնեսի պլանավորման ու կառավարման դասընթացների ավարտից հետո Հիմնադրամը կսկսի ծրագրի հաջորդ փուլը՝ բիզնես պլանների ֆինանսավորումը:

Ծրագրի մասնակիցներին անհրաժեշտության դեպքում տրամադրվում է նաև անհատական հոգեբանական աջակցություն: