«Ամադինդա» հարվածայինների լեգենդար խումբը՝ Հայաստանում

13 Հունիսի, 2019
«Երևանյան հեռանկարներ» 20-րդ միջազգային երաժշտական փառատոնի շրջանակներում hունիսի 19-ին Արամ Խաչատրյան համերգասրահում բացառիկ համերգով հանդես կգա «Ամադինդա» հարվածայինների լեգենդար խումբը: Աշխարհի չորս մայրցամաքներում հանդիսատեսին գերող խումբը կներկայացնի երաժշտություն Եվրոպայից մինչև Աֆրիկա և նախորդ ու քսանմեկերորդ դարերի հեղինակների գործեր:

«Ամադինդա» խմբի անդամների անսահման վիրտուոզությունը և երաժշտական հսկա կարողությունները ոգեշնչեցին քսաներորդ դարի հռչակավոր կոմպոիզիտորներին տասնամյակներ շարունակ աշխատելու խմբի հետ, որի արդյունքում ստեղծվեցին հարվածային երգացանկի գլուխգործոցներ` գրված հատուկ «Ամադինդայի» համար:

90-ականների երկրորդ կեսին խումբն իր գործունեության մեջ որդեգրում է երեք նոր ուղղություն՝ ավանդական հարվածային մշակույթների հետազոտությունը, խմբի անդամների կողմից նոր ստեղծագործությունների ստեղծումը և հարվածային գործիքների համար փոխադրված վաղ ժամանակաշրջանի գործերի կատարումը։ Արդյունքում «Ամադինդայի» երգացանկը հարստանում է ոչ միայն աշխարհի տարբեր կողմերի ազգային երաժշտությամբ, այլ նաև Զոլթան Վաչիի և Աուրել Հոլլոյի կողմից գրված «beFORe JOHN» իննամաս ստեղծագործությամբ, ինչպես նաև Ռավելի, Դեբյուսիի, Մուսորգսկու, Բարտոկի, Գերշվինի և դասական երաժշտության այլ հայտնի գլուխգործոցների փոխադրումներով։

Արդեն 35 տարի է, ինչ խմբին ուղեկցում է չմարող ջերմ ընդունելությունը` երկրագնդի 4 մայրցամաքներում։ Անսամբլը ելույթ է ունեցել Ասիայի, Ավստրալիայի, Ամերիկայի, Մեքսիկայի Եվրոպայի այնպիսի հանրահայտ համերգասրահներում, ինչպիսիք են Բեռլինի Ֆիլհարմոնիան, Վիեննայի, Ստոկհոլմի համերգասրահները, Լոնդոնի Ալբերտ թագավորական սրահը և Քունիս Հոլը, Մեցի Արսենալը, Թայբեյի ազգային, Հոնգ Կոնգի քաղաքային համերգասրահները, Սիդնեյի Յուջին Գուսսենս համերգասրահը, Դալասի Մեյերսոն սիմֆոնիկ կենտրոնը և Նյու Յորքի Քարնեգի համերգասրահը, այլոց շարքում։ Տարիների ընթացքում «Ամադինդան» արժանացել է բազմաթիվ մրցանակների և պարգևների։ Հիմնադրման առաջին իսկ տարում՝ 1985 թ.-ին, խումբը ստանում է Ռոտերդամում անցկացվող Ժամանակակից երաժշտության կատարողների Գաուդեամուս միջազգային մրցույթի առաջին մրցանակը։

Իր 35-րդ տարում՝ միջազգային երաժշտասեր հանրությունը համարում է «Ամադինդային» աշխարհի ամենայուրօրինակ և բազմադեմ հարվածային համույթներից մեկը։

«Երևանյան հեռանկարներ» փառատոնին աջակցում է «Իմ քայլը» բարեգործական հիմնադրամը:

Փառատոնն անցկացվում է Հայաստանի Հանրապետության վարչապետ Նիկոլ Փաշինյանի հովանու ներքո:

2019 թ.-ի «Երևանյան հեռանկարների հոբելյանական տարին մեկնարկել է ապրիլի 29-ին` բրիտանական The Swingles վոկալ խմբի համերգով, որին հաջորդել է լեգենդար դաշնակահար Իվո Պոգորելիչի մենահամերգը և մայիսի 28-ին տեղի ունեցած գրեմմիակիր ամերիկյան «Պարկեր» քառյակի առաջին ելույթը Հայաստանում:



Նորություններ

Այլ Լուրեր

news-listing-img
date piker 20 Հունիսի, 2019
Հանդիպում «Դասական երաժշտության բարեկամներ» նախաձեռնության շահառուների հետ
Այսօր Երևանի Կոմիտասի անվան պետական կոնսերվատորիայում տեղի է ունեցել հանդիպում «Իմ քայլը» հիմնադրամի ներկայացուցիչների և Հիմնադրամի «Հայաստանի դասական երաժշտության բարեկամներ» նախաձեռնության շահառու կազմակերպությունների ղեկավարների միջև։
news-listing-img
date piker 29 Մայիսի, 2019
Խաչփարի միջնակարգ դպրոցի սաները՝ «Պարկեր» լարային քառյակի համերգին
Մարզաբնակ երեխաների համար երեւանյան մշակութային կյանքը հասանելի դարձնելու՝ «Իմ քայլը» հիմնադրամի նախաձեռնության շրջանակներում երեկ Երեւանում էին Արարատի մարզի Խաչփար գյուղի միջնակարգ դպրոցի մի խումբ սաներ՝ մասնակցելու «Երեւանյան հեռանկարներ» դասական երաժշտության փառատոնի հերթական համերգին։
news-listing-img
date piker 22 Մայիսի, 2019
Ամփոփելով «Ուրվականը». արդյունքներ, արձագանքներ, նպատակներ
Մայիսի սկզբին «Իմ քայլը» հիմնադրամի աջակցությամբ Երեւանում առաջին անգամ տեղի ունեցավ նորագույն մշակույթի «Ուրվական» փառատոնը, որի մասին մինչ այսօր էլ խոսում է բազմազգ լսարանը։ Փառատոնի երեք օրերի ընթացքում շուրջ 3000 հոգուց բաղկացած լսարանը, որից ավելի քան 1000-ը հատուկ փառատոնի համար հայաստան ժամանած զբոսաշրջիկներ, հնարավորություն ունեցավ վայելելու փառատոնի հագեցած ծրագիրը՝ «Արամ Խաչատրյան» համերգասրահում բացման համերգից մինչեւ Մանկական երկաթուղու երեք հարթակներն ու «Միրզոյան» գրադարանի գիշերային ծրագիրը։